又到電影節時節。
今年中文片嘅陣容實在太誇張，令往常睇紀錄片、日本片為主嘅我都忍唔住要睇。暫時選擇如下：
胭脂扣：數碼化高清、哥哥、阿梅。Enough said.
大渡海：卡士強勁，小田切讓、宮崎葵、松田龍平，故事卻係講一班文人編辭典嘅經歷。有趣。
旺角卡門：當年無入場，家陣補返。
花瓣舞：主要係因為宮崎葵而揀，後311女性情懷，應該啱睇嘅。
大浩劫：應該會係最詳細講Holocaust嘅紀錄片，前、後篇九小時盤腸血戰。
沙漠梟雄：雖然屋企剛購入五十周年藍光版，但仍然會喺文化中心大劇院個大screen睇呢個8K修復版。相信感覺會比當年喺戲院睇更震撼。
閃靈237：寇比力克諸作品中，閃靈係其中一套心愛。紀錄片嘗試用唔同角度分析戲裏嘅細節，係陰謀論定係分析過度？觀眾自有定奪。
沒有蜜蜂的日子：一直有留意近年蜜蜂大量死亡嘅情況。呢套紀錄片以人類、蜜蜂、全球化生產去分析死亡事件嘅種種，值得一睇。
波蘭斯基的告白：入場原因只有四個字 – 波蘭斯基。
祖之根：日本311地震後，一個老災民嘅重建之路。